ՀԻՄՆԱԴՐՈՒՅԹՆԵՐ

«Համահայկական ճակատ» կուսակցությունը (ՀՃԿ), որպես՝ ազգային պահպանողական կուսակցություն, առաջնային նշանակություն տալով ազգային արժեքներին, իր նպատակների իրացման գործունեությունը բխեցնում է ազգի և հայրենիքի կայուն հարատևություն ապահովելու գաղափարներից:

Կուսակցության առաջնային գաղափարներից է աշխարհասփյուռ հայությանը «Հայաստան» բնօրրանի շուրջ համախմբելն ու Հայկական բարձրավանդակը յուրաքանչյուր հայի համար որպես անփոխարինելի հայրենիք ընկալելն ու ընդունելը:

Կուսակցության նպատակն է ապահովելու ազգի՝ իր ազգային գաղափարախոսության, կենսական ուժի, ստեղծագործ հանճարի ու ազատ կամքի դրսևորմամբ, իր գոյության հարատևումն է Հայրենիքում:

Յուրաքանչյուր ազգ, որն ունի արժեքներ և գաղափարախոսություն՝ հիմնված դարերից եկող պատնության վրա, սահմանում է իր արժեքների համակարգը, նպատակները, նախանշում է հարատևման ռազմավարությունը, որոնցով պետք է ամրապնդվի հավատը սեփական ուժերի ու ապագայի նկատմամբ և մշտապես զարգացում ապրի:

Հայ Առաքելական եկեղեցու դերն ամբողջ աշխարհում հայ մշակույթի ու լեզվի, հայապահպանման գործում բարձր գնահատելով կուսակցությունն այն համարում է հայ ինքնության անբաժան մաս: Այս սկզբունքով առաջնորդվելով կուսակցությունն արժևորում է Հայոց պատմության հեթանոսական և քրիստոնեական ժամանակաշրջանները և այն համարում է հայ ինքնության անբաժան մաս:

Կուսակցությունը պահպանողական է, ինչը նշանակում է պատմականորեն հաստատված և արդարացված հիմնարար արժեքների, բարոյական նորմերի պահպանում: Պահպանողականությունը հավերժի, մնայունի հաստատումն է և ապահովում է պատմության և ներկա ժամանակների կապը:

Կուսակցությունը լինելով պահպանողական կողմ է ազգերի մշակութային, գիտատեխնիկական, տնտեսական մերձեցման, բայց ոչ միաձուլմանը:

Կուսակցությունը սկզբունքորեն մերժում է ուժի միջոցով հասարակարգի փոփոխությունը, քանի որ մեր համոզմամբ այն խախտում է հանրային կյանքի բնականոն զարգացումը: Կուսակցության խնդիրն է համարժեք բարեփոխումների միջոցով կանխել հասարակական ցնցումները:

Կուսակցությունը, բոլոր հասարակական, քաղաքական ուժերի, անհատների հետ իր հարաբերությունները կառուցում է ազգային և պետական շահերի առաջնահերթության սկզբունքով, դրանք բարձր է դասելով անձնական և այլ շահերից: Այս սկզբունքն է, որ հուսալի հենք է ինչպես հոգևոր-մշակութային ինքնատիպությունը պահպանելու, այնպես էլ` համաշխարհային զարգացումներից ետ չմնալու համար:

Կուսակցությունը պետության գոյության հարատևությունը, ամրապնդումն ու կայուն զարգացումն ապահովելու, գործունեության հիմնական սկզբունքների և ուղղությունների վերաբերյալ ունի հետևյալ մոտեցումները.

Պետությունը պետք է ընկալվի որպես հայության նպատակների իրականացման հիմնական և ամենաարդյունավետ միջոց և պետության շարունակական զարգացումն ու հզորացումն է միակ երաշխիքը, որը պետք է ապահովվի ժողովրդի զարգացումն ու հարատևությունը, քաղաքացիների բարեկեցությունը, սահմանների պաշտպանությունը, ինչպես նաև մեր տեղն ու դերը միջազգային հարաբերություններում:

Կախված իրականացվող նպատակների, ծրագրերի լուծման արդյունավետությունից, պետական կառավարման համակարգը պետք է փոխվի և անցում կատարվի նախագահական կառավարման համակարգին, իսկ կառավարման համակարգի գործունեությունը պետք է հիմնված լինի օրենքի և իրավունքի բացարձակ գերակայության ու իշխանության, ազգային անվտանգության հայեցակարգերի վրա:

Պետությունը պետք է աջակցի քաղաքական համակարգի զարգացմանը, ժողովրդավարության կայացմանը, բարեփոխումների ճանապարհով: Բոլոր բարեփոխումները պետք է բխեցվեն հասարակության ավանդական արժեհամակարգերից, միաժամանակ ապահովելով քաղաքացիների իրավունքներն ու ազատությունները, բազմակարծության վրա հիմնված ժողովրդավարությունը:

Արտաքին աշխարհի, այդ թվում՝ տարածաշրջանի, երկրների հետ, քաղաքականության ոլորտում պետության գործունեությունը պետք է ուղղված լինի բարիդրացիական և կայուն հարաբերությունների հաստատմանն ու պահպանմանը, ազգային արժեքների պահպանմամբ միջազգային հանրությանը բնականոն ինտեգրմանը, նրանում Հայաստանի դերի մեծացմանը, աշխարհի մյուս երկրների հետ փոխշահավետ քաղաքական, տնտեսական, մշակութային և այլ կապերի զարգացմանը:

Հաշվի առնելով ազգային առանձնահատկություններն ու շահերը, տնտեսական քաղաքականությունը պետք է հիմնված լինի համաշխարհային փորձի վրա և պետությունը պետք է ապահովի տնտեսության պետական և մասնավոր հատվածների արդյունավետ համագործակցության համար նպաստավոր պայմաններ` հանդես գալով որպես սեփականության բազմաձևության և ազատական տնտեսական համակարգի զարգացման երաշխավոր: Ազատական տնտեսական համակարգը պետք է հիմնված լինի մրցակցության և ձեռներեցության ազատության վրա, գործելով շրջակա միջավայրի պահպանման հրամայականով, միաժամանակ մնալով սոցիալապես արդար և պատասխանատու:

Պետությունը պետք է ապահովի իր քաղաքացիների անվտանգությունը, պաշտպանի նրանց արժանապատվությունը, իրականացնի արդյունավետ միջոցառումներ իր քաղաքացիների կենսապահովման, պայմանների բարելավման և բավարարման համար անհրաժեշտ միջավայր ստեղծելու ուղղությամբ, ինչպես նաև ըստ արժանվույն գնահատի քաղաքացիաների վաստակը Հայրենիքի առջև:

Պետությունը պետք է ապահովի պայմաններ ավանդական, ամուր և առողջ ընտանիքների ձևավորմանը առավելագույնս նպաստելու համար և ընտանիքում ազգային-ավանդական արժեքների պահպանումն ու զարգացումը պետք է լինեն պետության կարևորագույն խնդիրներից, քանզի Հայ հասարակության հիմքն ավանդական ընտանիքն է:

Պետությունը պետք է անհատին կրթի խոր և բազմակողմանի գիտելիքներով, անհատի մեջ ներդնելով այն գիտակցումը, որ դրանք առաջին հերթին պետք է ծառայվեն Ազգի և Հայրենիքի հզորացմանը և իհարկե անձնական բարօրությանը, ձևավորելով մարդկային և ազգային բարձր արժեքներ դավանող սերունդ:

Գիտությունն ու մշակույթը պետք է ծառայեն աշխարհասփյուռ հայ ազգի հոգևոր և նյութական արժեքների վերականգնմանը, պահպանմանն ու զարգացմանը, առավելագույնս բացահայտեն և ճանաչելի դարձնեն հայի ինքնությունը, ինչպես նաև ապահովեն ավանդույթների ու գիտատեխնիկական առաջընթացի զուգակցումը` բարոյահոգեբանական, մտավոր և տեխնոլոգիական առաջնակարգ դիրքեր գրավելու համար: Մշակույթը, կրթությունը և գիտությունը պետք է լինեն պետական հոգածության հիմնական առարկա:

Պետությունն ունի պարտավորություն և պետք է ստեղծի առավելագույն բարենպաստ պայմաններ սփյուռքահայության ներուժի համախմբման, կապերի ամրապնդման և զարգացման համար` ի նպաստ Հայոց պետության հզորացման և Սփյուռքի արժանապատիվ գոյատևման, հիմնական նպատակ ունենալով սփյուռքահայության վերադարձը Հայրենիք:

Մարդու իրավունքների և ազատությունների, պարտականությունների և պատասխանատվության համադրումը պետք է հիմնվի հետևյալ սկզբունքների հիման վրա.

• Պետության գլխավոր հարստությունը մարդն է, ով պետք է ունենա ազգի և պետության հանդեպ պատասխանատվության գիտակցում` իր մտավոր, բարոյական, ինչպես նաև ֆիզիկական ներուժով,
• Պետությունը պետք է կարևորի համընդհանուր արդարությունը /օրենքի առջև բոլորի հավասարության սկզբունքը/, հավասարությունը, ճշմարտությունը, համերաշխությունը, փոխօգնությունը, մարդու արժանապատվությունը, ազատությունը և պատասխանատվությունը,
• Պետությունը պետք է ներդնի և ստեղծի պայմաններ տղամարդու և կնոջ հավասար իրավունքների ապահովման և իրացման համար, և այս սկզբունքը պետք է արտացոլվի պետության գործունեության բոլոր ուղղություններում,
• Պետությունը պետք է երաշխավորի, որ բոլորն ունենան հավասար հնարավորություններ պետության գործունեության բոլոր ուղղություններում, իրենց ներդրումը բերելով ազգի և պետության զարգացման ու բարեկեցության մակարդակի բարձրացման գործում,
• Հայաստանի յուրաքանչյուր քաղաքացու ձայնը պետք է լինի լսելի, քննադատությունը՝ ուշադրության ու հարգանքի արժանի, իսկ բազմակարծության, քաղաքական ազատությունների, մրցակցային հավասար պայմանների, մտքի, խոսքի, խղճի ազատության լիարժեք կենսագործումն այլընտրանք չունի:

Հիշատակված հիմնադրույթների իրականացման նպատակով Կուսակցությունը նախանշում է.

• պետական կառավարման համակարգի անցում նախագահական կառավարման համակարգի,
• պետական կառավարման համակարգի, նախարարությունների, գերատեսչությունների, տեղական ինքնակառավարման մարմինների, ինչպես նաև այլ պետական և տեղական մարմինների կառուցվածքային և ֆունկցիոնալ արմատական փոփոխություն,
• ռազմարդյունաբերության ներքին պոտենցիալի խթանում,
• զինված ուժերի վերազինում և արդիականացում,
• գիտության, արդյունաբերության խթանում և զարգացման համար պայմանների ապահովում,
• արտաքին քաղաքականության ոլորտում Հայաստանի դերի բարձրացմանն ուղղված ռազմավարական ծրագրի մշակում, դաշնակից երկրների հետ հարաբերությունների խորացում: Նոր դաշնակիցներ ձեռքբերելու նպատակով դիվանագիտական կապերի ընդլայնում,
• Արցախի հիմնախնդրի լուծում ԵԱՀԿ Մինսկի խմբի շրջանակներում,
• դատաիրավական համակարգի բարեփոխում, հիմնված միջազգային փորձի վրա,
• կրթության և առողջապահության ոլորտներում աստիճանաբար /2-3 տարի/, անվճար համակարգի անցում,
• գյուղատնտեսության զարգացման խթանում, որում մեծ դեր կխաղա ոռոգման ջուրը գյուղացիական տնտեսությունների համար անվճար դարձնելը,
• հարկային բեռի նվազեցում: Տնտեսական գործունեություն իրականացնելու համար նոր հիմնադրվող տնտեսավարող սուբյեկներին երկու տարով ազատում հարկերի վճարումից,
• կենսաթոշակների և նվազագույն աշխատավարձի բարձրացում կրկնակի չափով,
• բնական ռեսուրսների ազգայնացում,
• բանկային, ֆինանսավարկային համակարգի վերանայում, այդ թվում՝ պետության մասնակցությամբ նորերի հիմնադրում,
• ռազմավարական նշանակության օբյեկտների սեփականության ձևի վերանայում,
• սոցիալական բնակարանաշինության կազմակերպում, բազմազավակ ընտանիքներին /3 և ավելի երեխա/ անվճար հիմունքներով բնակարանի, բնակելի տան հատկացում,
• քրեական և ֆինանսական համաներում:

«ՀԱՄԱՀԱՅԿԱԿԱՆ ՃԱԿԱՏ» ԿՈՒՍԱԿՑՈՒԹՅԱՆ ԿԱՆՈՆԱԴՐՈՒԹՅՈՒՆԸ